Lorezaintza ekologikoak ingurumena errespetatzen du eta, naturaren dinamikari jarraituz, bizitzarako espazio osasungarriak lortzen ditu. Lurraren ezaugarriak indartzen ditu, emankortasuna kasu, eta landareen eta izaki bizidunen arteko oreka mantentzen eta/edo berreskuratzen saiatzen da.

Lorezaintza ekologikoa eginez, honako hauek lortuko ditugu: lurzorua epe luzera zaintzea; izurriteei eta gaixotasunei aurre egitea, izaki bizidunentzat kaltegarriak diren pestizidak erabili gabe; ingurune seguru eta osasungarriak sortzea, haurrek, nerabeek, helduek eta etxeko animaliek lorategiaz edo berdeguneaz segurtasun osoz gozatu ahal izan dezaten; ingurumen-poluzioa murriztea, lorategiko eta etxebizitzako hondakin organikoekin konposta egitea bultzatuz; eta uraren kontsumoa murriztea.